Fürobe-Toure bi Troumwätter

Halli Hallo

Das Wätter die Wuche isch ja wieder troumhaft! Da cha me sech ja aus Velofahrere gaaar nid öpe beklage 🙂 I ha dr Mänti u Zischti Obe gnützt u ha jewius ganz schöni Fürobe-Toure gmacht.

Am Mänti bini vo Basu via Waudeburger-Täli, Bausthu, Schmiedematt, Wiedlisbach hei uf Oute gfahre. D’Schmiedematt mitere regumässige Stigig vo um die 11% während guet 4 km isch e rächt asträngende Hoger, aber ou ganz schön – kes einzigs Outo het mi überhoupt u d’Obe ufem Plateau häts e Beiz für die, wo Durscht hei 🙂 Nach dere Äbeni geits no mau churz obsi u de bietet sech e Usblick übers Mittuland bis zu de Aupe (we z’Wätter mithiuft) – wunderschön! D’Temperature si o ganz agnähm gsi, je später dasses isch worde. Bi de so 21.20 h z’friede u glücklech daheim ytrudlet. (97 Km, 1200 Hm)

Geschter hani zäme mitere guete Fründin (wo übrigens das Jahr d’Challenge Single fahrt) es paar Basuland-Höger unger Reder gno. Mir si z’Basu am 4i vou motiviert Richtig Grellige gstartet. Üse erschte Astieg isch dr Nunnigerbärg gsi, grad gfougt vo dr Passwang u dr Breitehöchi u aus Dessär hei mir no dr Chiuchzimmersattu ybout, wo ig ja ar Tortour o i mire Route ha („o welch Freude“ ;-P). Mir hei beidi super Bei gha u mir heis souluschtig gha, gäu Rosi 🙂 Z’Rosi isch de när hei zu sich gfahre u i ha d’Witerfahrt uf Burdlef gnosse, wieder bi richtig agnähme Temperature. (102 Km, 1650 Hm – Rosi, bi dir wäres äuä 1800 Hm :-P)

Häbets guet!

Newsletter 

 

Fahrtechnik  

 

Reisen / Touren  

 

Biketreff Olten  

 

Impressum 

 

Kontakt 

 
Bikeschule Olten
Fabian Spielmann
Brückenstrasse 48
4632 Trimbach
___________________
Phone: +41 (0)79 417 26 23
Email: info@bikeschule-olten.ch