Sunntigsfahrt bi Apriuwätter

Hallo zäme

Eigentli hani ja hüt mitere Fründin übere Chlouse- u Pragupass wöue fahre. Aber d’Sandra Boner het geschter Obe im Meteo nid grad e Bombetag vorusgseit, drum hei mir üs de nid „gwagt“. Obwouhs ja bis i Nami ine totau okay wär gsi… Wie o immer… drfür bini mau ersch nach de 10e ufgstange (weiss scho gar nüm, wenn dass das z’letscht mau isch vorcho) u ha de mau gmüetlech zmörgelet. Ume Mittag ume hani mi de ufe Wäg gmacht: Bi übere Houestei, vo Läufelfinge übere uf Eptinge, de übere Bölche/Chilchzimmersattu abe uf Langebruck u de über d’Breitehöchi uf Mümliswiu, dert ischs witer gange übere Brunnersbärg uf Bausthu. Zwüsche Bausthu u Gänsbrunne ischs de ändlech mau 10 km meh oder weniger flach gange u am Schluss bini no dr Wissestei dür uf. Es het e Huufe sehr knackegi Astiege drbi gha u sisch fasch nur ufe u abe gange. Wättertechnisch hets scho nach 15 km afa tröpfele, aber denn ischs am Wätter no nid ärnscht gsi. Zwüsche düre het sogar d’Sunne no chli füre gugget 🙂 Währendem Ufstieg ufe Wissestei hets de afa rägne, entsprächend müehsam isch de o di üsserscht steili Abfahrt uf Solothurn gsi. Dert bini rächt pflotschnass acho u es het grad es Gwitter tobet über dr Stadt. Obwouh ig ursprünglech no ha im Sinn gha vo Solothurn uf Olte zfahre, u uf däm flache Stück chli d’Scheiche la zhange u uszfahre, hani mi wäg däm Gwitter de doch entschiede dr Räscht no mitem Zug zmache. Die Tour mit knapp 90 Km, 2450 Hm u viune Stigige zwüsche 14 u 20% het’s in sech, isch aber landschaftlech sehr schön!

Liebe Grüsseli Sue

Newsletter 

 

Fahrtechnik  

 

Reisen / Touren  

 

Biketreff Olten  

 

Impressum 

 

Kontakt 

 
Bikeschule Olten
Fabian Spielmann
Brückenstrasse 48
4632 Trimbach
___________________
Phone: +41 (0)79 417 26 23
Email: info@bikeschule-olten.ch